Калия хлорид 40 мг/мл 10 мл № 10 амп

Сипаттама

Дәрілік затты медициналық қолдану

жөніндегі нұсқаулық

Калий хлориді

Саудалық атауы

Калий хлориді

Халықаралық патенттелмеген атауы

жоқ

Дәрілік түрі

Инфузия үшін ерітінді дайындауға арналған концентрат 40 мг/мл, 10 мл

Құрамы

1 мл препараттың құрамында

белсенді зат – калий хлориді 40 мг,

қосымша заттар: декстроза моногидраты, хлорсутек қышқылы 1 М ерітіндісі – рН 3.0-4.0 дейін, инъекцияға арналған су.

Сипаттамасы

Мөлдір түссізден ақшыл сары түске дейінгі сұйықтық

Фармакотерапиялық тобы

Қан және қан түзу ағзалары. Қан алмастырғыштар және перфузиялық ерітінділер. Вена ішіне енгізуге арналған ерітінділерге қоспалар. Электролиттік ерітінділер. Калий хлориді.

АТХ коды B05XA01

Фармакологиялық қасиеттері

Фармакокинетикасы

Калий хлориді толық сіңеді. Калий деңгейі қалыпты пациенттерде енгізілген калийдің шамамен 90%-ы несеппен бірге бөлініп шығады.

Фармакодинамикасы

Калий негізгі жасушаішілік ион болып табылады. Препарат организмде су-электролиттік тепе-теңдікті қалыпқа келтіреді, калий тапшылығының орнын толтырады. Көптеген цитоплазмалық ферменттерді белсенді етеді, жасушаішілік осмостық қысымды, ақуыздар синтезін, амин қышқылдарының тасымалдануын, жүйке импульстерінің өтуін реттейді, бұлшықет дистрофиясында, миастенияларда қаңқа бұлшықеттерінің жиырылуын жақсартады. Калий иондары жүректің жиырылу жиілігін сиретеді, жиырылу белсенділігін төмендетеді, миокардтың өткізгіштігін, автоматизмін және қозғыштығын азайтады.

Азғантай дозаларда К+ коронарлы қантамырларды кеңейтеді, үлкен дозаларда – тарылтады. Калий ацетилхолин мөлшерінің жоғарылауына және орталық жүйке жүйесінің симпатикалық бөлімінің қозуына ықпал етеді. Орташа диуретиктік әсер береді. Калий деңгейінің жоғарылауы жүрек гликозидтерінің жүрекке уыттылық әсерінің даму қаупін төмендетеді. Бүйрек үсті бездерін стимуляциялайды және олармен эпинефриннің бөлініп шығуын ұлғайтады.

Қолданылуы

- қант диабеті, ұзақ диарея, құсу аясында, кейбір диуретиктерді (тиазидтік, тиазид тәрізді, ілмектік) қолданғанда, глюкокортикостероидтармен, жүрек гликозидтерімен, гипотензиялық препараттармен емдегенде пайда болған гипокалиемияны емдеуде және профилактикасында

- дигиталистік уыттануды емдеуде және профилактикасында

- шығу тегі әртүрлі аритмияларда (электролиттік бұзылулармен және абсолютті немесе салыстырмалы гипокалиемиямен байланысты)

- миокард инфарктісі бар науқастарда аритмияның профилактикасында (жедел кезеңінде).

Қолдану тәсілі және дозалары

Вена ішіне сорғалатып немесе тамшылатып енгізеді.

1 ампула (10 мл) 40 мг/мл калий хлориді ерітіндісінде 0,4 г калий хлориді бар. Изотониялық ерітінді алу үшін (алынған ерітіндінің концентрациясы 4 мг/мл), 50 мл 40 мг/мл калий хлориді ерітіндісін (2,0 г калий хлориді) инъекцияға арналған суда 10 есе (500 мл-ге дейін) сұйылтады және вена ішіне тамшылатып (минутына 20-30 тамшы) енгізеді.

Вена ішіне тамшылатып енгізу үшін ерітіндіні 500 мл 0,9% натрий хлориді ерітіндісіндегі немесе 5% декстроза ерітіндісіндегі (алынған калий хлориді ерітіндісінің концентрациясы 5 мг/мл) 2,5 г калий хлоридіне дейінгі (40 мг/мл калий хлориді 62,5 мл ерітіндісіне дейін) есеппен дайындауға болады.

Жағымсыз әсерлері

- жүрек айнуы, құсу, диарея, метеоризм, абдоминальді ауырулар, АІЖ шырышты қабығының ойық жаралануы, асқазан-ішектен қан кетулер, перфорация және ішек бітелісі

-парестезиялар, бұлшықет әлсіздігі, сананың шатасуы

- артериялық қысымның төмендеуі, аритмиялар, атриовентрикулярлы өткізгіштіктің толық АV блокадасы пайда болғанға дейін баяулауы, жүректің тоқтап қалуы (артық дозаланғанда)

-гиперкалиемия, аллергиялық реакциялар.

Қолдануға болмайтын жағдайлар

- препарат компоненттеріне аса жоғары сезімталдық

- бүйректің жедел және созылмалы жеткіліксіздігі

- толық атриовентрикулярлы блокада

- бүйрек үсті безі жеткіліксіздігі

- калий жинақтаушы диуретиктермен қатарластыра емдеу

- гиперкалиемия

- метаболизмдік бұзылулар (ацидоз, гипонатриемиясы бар гиповолемия)

- асқазан-ішек жолының эрозиялы-ойық жаралы аурулары

- 18 жасқа дейінгі балалар және жасөспірімдер (тиімділігі және қауіпсіздігі анықталған жоқ)

- жүктілік және лактация кезеңі.

Дәрілермен өзара әрекеттесуі

Жүрек гликозидтері ерітінділерімен фармацевтикалық тұрғыдан үйлеседі (олардың жағымдылығын жақсартады). Аритмияға қарсы дәрілік заттардың теріс дромо- және батмотроптық әсерін күшейтеді.

Поляризациялаушы қоспалар құрамында (декстрозамен және инсулинмен біріктіріп) жүрек ырғағының миокард инфарктісінде, эктопиялық аритмияларда және жүрек гликозидтерімен артық дозаланғанда қалыпты болуына мүмкіндік береді.

Бета-адреноблокаторлар, циклоспорин, гепарин, калий жинақтаушы диуретиктер, калий препараттары, АӨФ тежегіштері, қабынуға қарсы стероиды емес дәрілер гиперкалиемияның пайда болу қаупін арттырады. Хинидиннің әсерін, дизопирамидтің жағымсыз әсерін күшейтеді.

Айрықша нұсқаулар

І-ІІ дәрежелі атриовентрикулярлы блокада кезінде сақтықпен қолдану керек.

Емделу кезеңінде қан сарысуындағы калий иондарының мөлшерін, ЭКГ-ні бақылау қажет, гипокалиемияны емдеген кезде қышқыл-негізді жағдайды бақылау керек.

Гиперкалиемияның өліммен аяқталуға әкеп соғатынын ескерген жөн, ол тез пайда болуы және симптомсыз өтуі мүмкін.

Калий хлоридін балаларға қолданудың қауіпсіздігі және тиімділігі анықталған жоқ.

Жүктілік және лактация

Қолдану тәжірибесінің жеткіліксіз болуына байланысты, жүкті әйелдерге тағайындалмайды.

Лактация кезеңінде қолдану қажет болғанда емшек емізуді тоқтату жөніндегі мәселені шешкен жөн.

Дәрілік препараттың көлік құралдарын немесе қауіптілігі зор механизмдерді басқару қабілетіне әсер ету ерекшеліктері

Ықтимал жағымсыз әсерлерді ескеріп, көлік құралдарын басқарғанда және қимыл-қозғалыстың дәл үйлесімін қажет ететін жұмыстарды жасағанда сақ болу қажет.

Артық дозалануы:

Симптомдары: гиперкалиемия (қан сарысуында калий иондары концентрацияларының 5,5-тен 6,5 мэкв/л-ге дейін жоғарылауы), ол мыналар түрінде білінеді: бұлшықеттік гипотонус, аяқ-қолдардың парестезиялары, атриовентрикулярлы өткізгіштіктің баяулауы, аритмиялар, жүректің тоқтап қалуы. Электрокардиограмманың ерте өзгерулері – V2-V4 кеуде жалғамдарында айқынырақ, төбесі үшкірленген және негізі тар биік Т тісшесі болады. Орташа гиперкалиемияда (қан сарысуындағы калий иондарының концентрациясы 6,5-8,0 мэкв/л) электрокардиографиялық белгілері мыналар болып табылады: Р тісшесі амплитудасының азаюы, РQ аралығының ұзаруы, QRS кешенінің кеңеюі, R тісшесі амплитудасының төмендеуі, қарыншалық экстрасистолия.

Гиперкалиемияның өте ауыр симптомдары – бұлшықеттің салдануы және жүректің тоқтап қалуы (электрокардиограммада өзгерулер – баяу немесе жылдамдатылған идиовентрикулярлы ырғақ, қарыншалар фибрилляциясы, асистолия) қан сарысуындағы калий иондарының 9-14 мэкв/л концентрацияларында пайда болады.

Емі: ішке немесе в/і – натрий хлоридінің ерітіндісі; в/і – 300-500 мл декстроза ерітіндісі 1000 мл-дегі 10-20 ӘБ инсулинмен бірге; қажет болғанда – гемодиализ және перитонеальді диализ.

Шығарылу түрі және қаптамасы

Бейтарап шыныдан жасалған ампулада 10 мл-ден.

10 ампуладан медициналық қолдану жөніндегі қазақ және орыс тілдеріндегі нұсқаулықпен картон қорапшаға салынады.

Сақтау шарттары

15С-ден 25С-ге дейінгі температурада сақтау керек.

Балалардың қолы жетпейтін жерде сақтау керек!

Сақтау мерзімі

4 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

«Новосибхимфарм» АҚ

630028, Ресей, Новосібір қ., Декабристер к-сі, 275

тел. (383) 363-32-44,

факс (383) 363-32-55

Тіркеу куәлігінің ұстаушысы

«Новосибхимфарм» АҚ

630028, Ресей, Новосібір қ., Декабристер к-сі, 275

тел. (383) 363-32-44,

факс (383) 363-32-55

Қазақстан Республикасы аумағында тұтынушылардан дәрілік заттың сапасына қатысты шағымдарды (ұсыныстар) қабылдайтын және

дәрілік заттың тіркеуден кейінгі қауіпсіздігін бақылауға жауапты ұйымның атауы, мекенжайы және байланыс деректері (телефон, факс, электронды пошта)

«Валента Азия» ЖШС, Қазақстан Республикасы, 050009, Алматы қаласы, Алмалы ауданы, Абай даңғылы, № 151 үй, кеңсе № 1102

Тел./факс 8 (727) 334-15-51, Е-mail: asia@valentapharm.com

Дәріханалар

Қалалар